Watter polisse vorm deel van die Bestorwe Boedel en watter word uitgesluit, asook die onderskeie belasting implikasies.
POLISSE
- ‘n Polis wat uitbetaal, maar geen spesifieke begunstigde (spesifieke persoon/instansie) word benoem nie, vorm deel van die bestorwe boedel van die oorledene; Die rede vir voormelde is dat die polis uitbetaal en in die boedel as ‘n bedrag kontant ontvang word. Die kontant vorm dan deel van die bestorwe boedel in geheel en word aan die erfgename verdeel soos in die oorledene se Testament gestipuleer of per Intestate Erfreg stipulasies (Intestate Succession Act 81 of 1987, soos gewysig).
- ‘n Vraagstuk waaroor daar dikwels onduidelikheid is, is of ʼn polis waar daar wel ‘n begunstigde gestipuleer word deel vorm van die bestorwe boedel of direk oorgaan na die benoemde begunstigde? Die laasgenoemde is van krag: ‘n Polis met gestipuleerde begunstigde vorm nie deel van die Boedel nie en/of word nie as ‘n bate in die Likwidasie en Distribusie rekening van die Boedel gelys nie.
Dit het ook tot gevolg dat die Eksekuteur nie geregtig is op ‘n persentasie van die polis nie; Volgens die Administration of Estates Act 66 of 1965 (soos gewysig), is die Eksekuteur geregtig op ‘n persentasie van die totale Boedelwaarde (tot en met 3.5%, maar kan die persentasie ook in Testament onderhandel word). Aangesien die genomineerde polis nie deel van die boedelwaarde geag word nie, het dit ook nie ‘n invloed op die Eksekuteur se vergoeding nie. Wat die bepaling regverdigbaar maak, is die feit dat die Eksekuteur ook geen administratiewe funksie ten opsigte van voormelde polis het nie; Die polis word direk vanaf die instansie na die genomineerde Begunstigde uitbetaal.
- Die sogenaamde ‘’Keyman Policy’’ vorm ook nie deel van die bestorwe boedel nie; ʼn ‘’Keyman Policy’’ is ‘n polis uitgeneem deur ‘n maatskappy/instansie op ʼn direkteur / aandeelhouer / “keyman’’ se lewe en waar die maandelikse premies vir voormelde polis betaalbaar is deur die maatskappy/instansie. Die rede vir voormelde is soortgelyk aan die polis waar ‘n begunstigde genomineer word en i.e. aangesien die fondse direk oorgaan na die maatskappy/instansie en nie deel vorm van die Bestorwe Boedel nie.
Wat is die belasting implikasie vir die begunstigde van ‘n Polis?
- Die belasting betaalbaar op ‘n polis waar geen begunstigde genomineer is nie (of waar die oorledene self genomineer is) is betaalbaar deur die Boedel self, alvorens finalisering van die Boedel. Die rede is vanselfsprekend dat die polis deel vorm van die Bestorwe Boedel in geheel en deur die Eksekuteur behartig moet word.
- ‘n Polis waar ‘n begunstigde egter wel genomineer word en dus direk uitbetaal, plaas die belasting verantwoordelikheid op die begunstigde in persoon en is nie betaalbaar deur die Bestorwe Boedel nie.
(Sars stipulasie in hierdie verband: https://www.sars.gov.za/types-of-tax/estate-duty/)).
Belangrik om hier die volgende te noem: Die huidige wetgewing maak voorsiening daarvoor dat alles aan ‘n wettige gade bemaak aftrekbaar is vir doeleindes van Boedelbelasting (onderhewig aan sekere voorwaardes soos uiteengesit in die Estate Duty Act 45 of 1955 [EDA], section 4(q)).
- Die ‘’Keyman Policy’’ is nie onderhewig aan Boedel belasting nie, aangesien dit nooit deel vorm van die Boedel nie.
Daar moet aan drie vereistes voldoen word om voormelde Belasting vermyding te regverdig in terme van die Boedelbelasting wetgewing [EDA]:
- Die persoon wie se lewe verseker was, mag nie self die polis uitgeneem / versoek het nie;
- Die persoon wie se lewe verseker was, mag nie self die maandelikse premies vir die polis betaal het nie (direk of indirek);
- Die versekerde boedel, enige familielid of afhanklike, of enige maatskappy wat ‘n familie-maatskappy geag te word, mag op geen wyse van die polis voordeel trek nie (konsepte “relatives” en “family company” gedefinieer in die (EDA section 1).
- Die ‘’Keyman Policy’’ is egter wel onderhewig aan die Inkomste Belasting wetgewing (Income Tax Act 58 of 1962).
Belangrik om hier die volgende te noem: Alle premies wat betaal is ten opsigte van die polis, is aftrekbaar van die opbrengs, alvorens die belasting op die totale inkomste ten opsigte van die polis bereken word (EDA section 11(w)).
(Sars stipulasie in hierdie verband: Estate Duty Implications on Key Man Policies – External Guide (sars.gov.za))
Boedelbelasting koerse:
- ‘n Vrystelling van die eerste R3.5 miljoen van ‘n boedel is tans toelaatbaar onder die Suid-Afrikaanse Boedelbelasting wetgewing;
- 20% boedelbelasting is betaalbaar op die netto-waarde van die boedel tussen R3.5 miljoen en R30 miljoen;
- 25% boedelbelasting is betaalbaar op die netto-waarde van die boedel bo R30 miljoen.
(Sars stipulasie in hierdie verband: Afr20180386T-Website_ESTATE-DUTY.pdf (sars.gov.za)).
Artikel geskryf deur:
Annelie Kriek (Direkteur van OAK LAW)
info@oaklaw.co.za / 012 345 3761